صرخة اب .. وقف امام زوجته لتعدل له شماغه الاحمر,

" مصالح "

بقلم محمد العمايره

وضع في جيبة دشداشه الابيض ، زجاجة عطر يمسح بها يديه بين الحين ، والاخر كان قد احضرها له جاره بعد عودته من اداء العمرة, وقف امام زوجته لتعدل له شماغه الاحمر, صرخ لابنه شاتي " جاهز يابه تأخرنا؟!" ركب في المقعد الامامي لسيارة كيا سيفيا قائلا " توكلنا على الله ", على اول كازية وضع بخمسة دنانير بنزين واقسم " ما حدا بدفع غيري ".
نظر الى ابو العبد الذي يجلس في المقعد الخلفي وسأله " شوفتك منلاقيه بالدار والا مثل المرات السابقة؟" رد ابو العبد " توكل على الله يا حجي ان شاء الله غير نلاقيه بقولوا دايما يوم الجمعة بصلي بالقرية", وصلوا الى منزله سأل ابو شاتي مستغربا " مش شايف سيارته معقول صافها بالكراج!!؟", اخرج زجاجة العطر من جيبة مخاطبا ابو العبد " مد ايدك اعطرك قبل ما نفوت " ثم مسح لحيته, طرقوا باب المنزل, خرج احدهم مرحبا " اهلا وسهلا تفضلوا ", جلسوا في غرفة الضيوف, صب لهم القهوه الساده وتركهم لوحدهم مستأذنا.
بعد دقائق دخل شخص اخر ورحب بهم مرة اخرى" اهلا وسهلا شرفتونا عمي"
ابو شاتي: يزيدك شرف عموه , من غير صغرة ابو علي موجود؟
المعزب : لا والله عموه مو موجود طلع قبل الصلاة على عمان.
ابو شاتي : طيب عموه متى بكون موجود؟
المعزب : والله يا حجي ما اله وقت معين حسب فضويته.
ابو شاتي : الله يعطيه العافية.
المعزب : والله يا حجي من يوم ما استلم هالمنصب مو فاضي يحك راسه.
ابو شاتي : بعرف عموه , ابو علي زلمه مليح وبستاهل كل خير, بس عدم المؤاخذه شو صار بالورقة اللي اعطيتك اياها المره الماضيه.
المعزب: اعطيته اياها يا حجي وابو علي مثل ما حكيت زلمه مليح وبساعد كل الناس وحكى اذا فيه مجال ما راح يقصر.
ابو شاتي: لعاد عموه سلم عليه ومنستأذن.
" ابو شاتي نصيحتي الك وفر بنزينات السياره ولا تغلب حالك راح يزورك "ابو علي" لحاله قبل الانتخابات ".

تعليقات

المشاركات الشائعة من هذه المدونة

مدعوون للمقابلة الشخصية لغايات التعيين بالتربية